公視新聞網 https://news.pts.org.tw/article/703891 台語文化營傳母語 搬戲、繪本教囡仔認捌地方 發布時間：2024-07-08 19:15 更新時間：2024-07-08 20:04 記者 彰化報導 https://www.youtube.com/watch?v=3Ih6D-ZKda8 關懷文教基金會連紲十外冬，佇歇熱的時舉辦台語文化營，今年活動以生態佮地方特色做 主題，用劇場、布袋戲、繪本這三種方式來表演。主辦單位表示，今年閣有捌參加過營隊 的大漢囡仔轉來tshuā營隊，真歡喜看著台語一代一代傳承。（這條新聞標題、導言、內 文是台語文。） 囡仔兄搬戲演一隻蠘仔，因為環境污染造成蠘仔跤變色的故事，另外閣有鯊魚隊，勸人毋 通食魚翅。這是關懷文教基金會今年的趣味台語文化營活動，教囡仔用台語搬戲，認捌生 態保育、地方特色，最後上台表演，發表成果。 參加營隊的囡仔：「逐家做伙耍，做伙搬戲，做伙講台語真趣味。」 tshuā隊老師 陳承佑：「總共有六个隊，總共有三種無仝款的主題，毋過仝款攏有一个 核心就是講，予囡仔會當有表演的機會。」 三工的營隊課程，今年活動以生態佮地方特色做主題，用劇場、布袋戲、繪本這三種方式 來表演，已經連紲十外冬攏舉辦台語營隊的關懷文教基金會表示，10外年的時間落來，今 年有袂少少年輩轉來tshuā營隊，是真好的傳承。 關懷文教基金會董事長 周清玉：「今年特別歡喜就是有真濟學校、台語文系的學生攏來 做這个隊員，大漢囡仔tshuā細漢囡仔，閣有專業老師。對台語應該會真順利來推動。」 關懷文教基金會表示，除了透過營隊活動予囡仔人講台語，其實家庭環境嘛真要緊，基金 會2018年佇彰化成立頭一个台語文園區的時，就以民間的力量開始咧sak母語家庭認證， 毋過干焦一个所在咧做，是絕對無夠的，望政府重視台語文化園區欠缺的問題，也向望眾 人做伙加入母語家庭，予台語會當代代傳承。 陳稷安/編輯 -- ※ 發信站: 批踢踢實業坊(ptt.cc), 來自: 111.255.116.62 (臺灣) ※ 文章網址: https://www.ptt.cc/bbs/Gossiping/M.1720449938.A.0FE.html